Osa ka gatos naliwat nga pamilya nagkaada hin ka sigurohan yana nga adlaw nga maiira na an tuna nga tinitindogan han ira mga balay ha GMA Kapuso Village ha Brgy. 106 Sto. Niño.

Ha ngaran ni Mayor Alfred S. Romualdez pinangulohan ni Ted Jopson, mangulo han City Housing and Community Development Office an pag panhatag han Certificate Of Confirmation.

Kaupod nga nag-atiman han mga tawo an iba pa nga mga taga City government nga hira Mariya Lagman, Ruth Ramirez, ngan City Councilor Aimee Grafil, Kap. Abet Eviota ngan mga personales han City Housing.

An 100 ka pamilya nga nakakarawat yana nga adlaw, Nov. 11, han ira mga confirmation in otro nga ginpahinumdum nga diri gud igbaligya ha kaorhian an ira mga tuna ngan pabahay.

An GMA Kapuso Village pabahay, nga hatag han GMA Kapuso Foundation, in aada hin tuna nga gintatag-iyahan han City government – ngan ini an pinaka hiluag an lot area ha sukol nga 32 square meters kumpara han iba nga mga pabahay ha Norte Tacloban, siring ni Jopson, salit angay gud ini pag mayuyuon han mga nagpakadara hini basi diri mawara haira.

Ha padayon nga pagproseso han mga titulo han tuna, waray na babayaran an mga benepisaryo kay lilibrehion na ini han City government ha mando ni Mayor Romualdez.

M. Padernos/CIO